غريبة الدنيا والله
ما فيها اي شئ باقي
ولا عايش بيتعايش
مع كلمة دوام الحال
ولا صاحب بيتصاحب
يقول بالحضن يا مراحب
وكان لي يا ناس
ف يوم صاحب
خدعني بطيبته وكلامه
شغلني بكل اوهامة
وصدقته عشان صاحبي
وقالي تعالي نتلاقي ف دنيا الخير
وتبقي جناحي واكونلك
جناح الطير
ونطفي نظرة مشتاقة
ونبعد عن جنون الغير
وصدقته عشان صاحبي
لقيتني معاه بقيت مغلوب علي أمري
بقيت مأمور جناح مكسور
سقاني المر من كاسه
وكتفني بحراسه
والي حتعلي وحتعلي لكن
تمشي علي طبعي
وصدقته عشان صاحبي
بقيت مأمور وأنا أمر
بقيت مأسور وأنا اللي ف قلب ميداني
بكون أسر
وقالي نطاطي ونطاطي
وتبقي ف ليلي وطواطي
وأنا كنت ف نهاري الصقر
افادي النخل وأنا راضي
لقيته معايا بيكابر
بيتمنظر ويتكابر
بقيت أيوب معاه صابر
وصدقته عشان صاحبي
وجالي ف يوم وبكاني علي حالي
بمد الايد عشان أخد حلال مالي
لقيته بصوته بيقولي وأنا مالي
وقالي يا واد مهيش فارقة
ده جيب واحد
وصدقته عشان صاحبي
ويوم ورا يوم
يعلي ويبني ف مقامه
ويرمي لي فتافيته
وينعتني بخدامه
ويفشي كل أسراري
يسمم ليلي ونهاري
وقالي ف يوم متزعلشي
دأنا كنت معاك بضحك
وصدقته عشان صاحبي
وقلت ف يوم أنا عاوز أكون زيك
ما أنيش أمور وبالاجرة
ولا عامل وبالسخرة
ولا شحات ف باب حيك
د مالي هو صار مالك
تموت أيدي ف الفاعل
وتاخد كل ده لحالك
ويضحك ضكه باستهتار
يقولي اصبر استني
وبستني وبستني
وصدقته عشان صاحبي
وجالي ف يوم وسرقني
ومد بأيده ف جيوبي
وجاب رجالته حواليا
ولولا القوة ف عروقي
محدش قال حيسبقني
وصدقت انه كان نمرود
وعمره ف يوم ما كان صاحبي
غريبة الدنيا والله
ما فيها اي شئ باقي
ولا صاحب بيتصاحب
يقول بالحضن يا مراحب
ودي كانت يا ناس قصة
بتحكي حكايتي مع صاحب
ليست هناك تعليقات:
إرسال تعليق